ஐபிஎல் கிரிக்கெட் தொடரில் மும்பை அணிக்கு எதிரான போட்டியில் டெல்லி கேபிடல்ஸ் அணி 10 ரன்கள் வித்தியாசத்தில் வெற்றி பெற்றது.
டெல்லியில் நடைபெற்ற இந்த போட்டியில் டாஸ் வென்ற மும்பை அணி பவுலிங்கை தேர்வு செய்தது. இதையடுத்து டெல்லி அணியின் தொடக்க வீரர்களாக ஜேக் ஃப்ரேசர் மற்றும் அபிஷேக் போரல் களம் இறங்கினர். போரெல் ஒருநாள் போட்டியை போல நிதானமாக விளையாட, ஃப்ரேசர் மும்பை பவுலிங்கை வெளுத்தெடுத்தார்.
27 பந்துகளை சந்தித்த அவர்6 சிக்சர் மற்றும் 11 பவுண்டரியுடன் 84 ரன்கள் குவித்து ஆட்டமிழந்தார். இருவரும் முதல் விக்கெட்டுக்கு 114 ரன்கள் பார்ட்னர்ஷிப் அமைத்தனர். போரெல் 36 ரன்களில் ஆட்டமிழக்க அடுத்து வந்த ஷாய் ஹோப்ஸ் 17 பந்தில் 5 சிக்சருடன் 41 ரன்களும், கேப்டன் ரிஷப் பந்த் 29 ரன்களும் சேர்த்தனர்.
கடைசி ஓவர்களில் டிரிஸ்டன் ஸ்டப்ஸ் அதிரடியாக 48 ரன்கள் எடுக்க 20 ஓவர்கள் முடிவில் 4 விக்கெட்டுகளை மட்டுமே இழந்த டெல்லி அணி 257 ரன்கள் குவித்தது. டெல்லி இன்னிங்ஸில் மொத்தம் 17 சிக்சர்கள் விளாசப்பட்டன.
258 ரன்கள் எடுத்தால் வெற்றி என்ற கடினமான இலக்கை நோக்கி மும்பை அணி வீரர்கள் களம் இறங்கினர். இஷான் கிஷன் 20 ரன்னும், ரோஹித் சர்மா 8 ரன்னும் எடுத்து வெளியேற அதிகம் எதிர்பார்க்கப்பட்ட சூர்யகுமார் யாதவ் 26 ரன்கள் சேர்த்தார்.
நீண்ட நாட்களுக்கு பின்னர் அதிரடியாக சேர்த்த ஹர்திக் பாண்ட்யா 24 பந்துகளில் 46 ரன்கள் எடுத்தார். விக்கெட்டுகள் ஒருபக்கம் விழுந்தாலும் திலக் வர்மா – டிம் டேவிட் இணை சிக்சரும் பவுண்டரியுமாக விளாசி அணிக்கு நம்பிக்கை ஏற்படுத்தியது.
டிம் டேவிட் 17 பந்துகளில் 37 ரன்களும், திலக் வர்மா 32 பந்துகளில் 63 ரன்களும் சேர்த்து ஆட்டமிழந்தனர். கடைசி ஓவரில் அணியின் வெற்றிக்கு 25 ரன்கள் தேவைப்பட்டபோது மும்பையால் 15 ரன்கள் மட்டுமே எடுக்க முடிந்து 10 ரன்கள் வித்தியாசத்தில் தோல்வியடைந்தது.
.
